You are here: HomeArticlesLiteratureBible Mellahna Leh Jerusalem Thak, Belamnou’ Zi – Upa T. Gouzanang

Bible Mellahna Leh Jerusalem Thak, Belamnou’ Zi – Upa T. Gouzanang Featured

Written by  Published inLiterature Monday, 07 December 2015 10:42

Bible Mellahna Leh Jerusalem Thak, Belamnou’ Zi – Upa T. Gouzanang

Printer : Genesis Printer, Guwahati : 2015

Book Review by: P. Phungchinthang Guite

 

Laibu ka sim ding chiangin, a bu min, a bukawm – ama leh a nung, a sung leh apua a, a laibu toh kisai phatna leh pahtaknate, laibu latnate sim masain a thubul matkhiak ka sawm zel hi. Tua dan mahin Upa T. Gouzanang laibu Baibul Mellahna leh Jerusalem Thak, Mou, Belamnou Zi ka vel a. Englishten “Do not judge a book by its cover” a chih uh bang deuhin a bukawm a a latdan bang mai ana hi kei hi. A bukawm a ma leh a nung ah Salem (Jerusalem) khopi hileh kilawmtak a kiphah zihziah a. A nunglam bukawm ah gelhtu leh a zi sangawngsau tunga tuang lim tungah “Ka khualzinna in ah na thusehte ka laa ahi ngitnget hi” (Sam 119:54) chih kigelh ka muhin, a leitung khualzinna hia khalam chih khawng ka suangtuahna ah a hong lut a, a bu min toh bangchi kizop a de aw ka chisim a.

 

A ban i et leh a gelhpa suangtute anu leh a pa lim a kitak a ‘ngilhlouhna’n’ chih thumal gelh ahi kei na a, hi in ka koih mai. Laigelhpa - Thumasa, C.Hangsing MCS (retd) - Hoih Sakpihna, Rev Nengzakhai Ex-Principal GBC - Thukup leh Rev Khen P Tombing, Chief Coordinator (PCIR) - Message in a zui a – ngaihdan khat a piang thei ngal mai zel. Huai banah laigelhtupa suangtute, a tu leh tate min a ki gelh diudeu , Bible, Jerusalem Thak, Mou, Belamnou’ Zi mel chikchiang a hong kilak ding a de aw ka chi man dek a. A lengkhiahna mai ana hi a, a thupatna din, Bible thu a malai a min, thumal theihtuak, i zatzat sa lah hi, hilehle min hon dong leh hilhchet geih theih ngellouh 84 tak a hon hilhchian phot a, huchiin Bible toh kisai a lunglut huai thu bangzah hiam taklangin thu hon pan hi. A kip a kawi bel a simtu sim din i sit ding.

 

Hiai laibu thutuunte, a bawngbawngin luikhiak ahi a. Bawng khatna – Thukhun Lui leh huai hunlai a thu bul-le-balte hon tawmkhawm a. Bawng nihna – Thukhun Thak leh huai hunlai a thu bul-le-balte hon lemkhawm a. Bawng thumna  - Laisiangthou thu a hihna dan a fiahtak a kamin a gen khiak zohlouh thu laigilte hon kheuh khia hi. Huchiin Bible, Jerusalem Thak, Mou – Belamnou Zi mel tomkim takin, ei mimawlte bak ngal theih din hon thuk khia hi. A hihna takin hiai laibu sung a kigelhte  100 lak a 30 khawng (30%) thei philhphelh leng le thiuloji toh kisai misiamte toh sawtpipi houlim khawm theihna ding khop om tham ana hi hi. Huchibangte tuh Thukhun Lui leh Thak sarvei (OT/NT Survey) ah a buai nawn kei di uh.

 

Upa Gouzanang, Paite pau siam tak ahi ding. Bukpi awphawi a i sim a a chian bangin awphawi dang a sim in leng hiai thiulojikal deserteson a dau tuan het kei. Sinlai bu (Text book) bang a gelh ahi a, mawl tak a luikhiak ahihhangin sim kawm a ngaihtuah ngai tampi a omsak thei hi. A sit huai het kei. Amah heutupa milun phamsa H. Nengzachin laigelhte sim mah a kibang thei. Haiar kritisism (higher criticism) leh hermeniutik (hermeneutics), Masoretik teks (Masoretic Text), kenon (canon) chih thumalte a zat louh hangin a kihel a, ei  baibul sinna sang leh seminari khawng a siamna a sin lou, mi nautangte a ding a Pathian thu theihna vantang behlapna dingin Paite pau a simtheih ding a hon gelh khiak  tuh nam adia vangphatna lianpi mahmah hiin ka ngai.

 

A hi a suah nawn chiangin pruf riding (proof reading) leh Paite Laipau Saipawlte (PLS) gelhdan toh etnawn ahoih kha ding. Kopirait (copyright) tungtang leng buaina omlou din ngai leng.

 

A bu mel, a leiaut (layout), a laigelhte a fel chitchet a, a sim leng a nuam. Hichibang laibu pek 130 sung a Laisiangthou toh kisai thugil leh theihtuak hiai zah zouzai, a poimoh tengteng phial tomkhawm a, koih khawm thei midang van nuai ah a om de aw chih dan ahi. Zat tangzang thunasemtute kol ding leh tualsung saptuam leh  laibusaal (library) teng a koih ding chi ahi. Akua akua inleng thiuloji zilna ding a orianteson kawrs (orientation course) din zangle uh leng  sit huai asa kei ding uh.

 

Laibute muhtheihna mun:

Convention Book Room

Hebron Veng,  New Lamka

 

Student Book Store

RayburnCollege

Hebron Veng, New Lamka

 

Upa T. Gouzanang Mobile  9856665523

Read 1129 times Last modified on Monday, 07 December 2015 16:30
Login to post comments